Rrezikohet seriozisht jeta e afro 300 nxënësve të Shkollës së Mesme të Bashkuar në fshatin Zgosht të Komunës së Lunikut. Çarjet e mureve të gjysmës së ndërtesës së kësaj shkolle, që vazhdojnë prej tri ditësh, janë thelluar më tepër në natën e mbrëmshme, si shkak i shtimit të reshjeve. Kjo ka qenë edhe arsyeja që Zyra Arsimore e Rrethit të Librazhdit në bashkëpunim edhe me drejtorinë e shkollës kanë pezulluar mësimin pothuajse për gjysmën e klasave të kësaj shkolle. Ndërsa toka rreth pjesës lindore të godinës ka krijuar të çara të thella, që shkojnë deri në rrugën kryesore, muret e katit të parë rezultojnë të çara në shumë pjesë dhe ngjiten deri në katin e dytë.
“Kemi pezulluar plotësisht mësimin në katër klasa mësimore të katit të parë, pasi mund të rrezikohet seriozisht jeta e nxënësve”, tha Selim Biçaku, drejtori i shkollës.

Vendose ne Facebook