Ditët kalojnë dhe ekipet e kategorisë së parë po formatohen për fazën e dytë, por e kundërta ndodh me Sopotin, ku nuk vihet re asnjë mundim për të ndryshuar diçka. Ky ekip vazhdon të mbetet në një situatë të plotë agonie, në një kamp të braktisur. Megjithëse situata është kritike, askush nuk e merr fjalën për ta nxjerrë Sopotin nga kjo gjendje, ku është zhytur prej kohësh. Duke parë largimet e shumta pas fazës së parë, gjendja bëhet alarmante. Nga ana tjetër, trajneri Isuf Ibërshimi, i kontaktuar nëpërmjet telefonit nga “Sporti shqiptar”, pohon se nuk ka vendosur nëse do ta vazhdojë ta drejtojë Sopotin apo jo.

Pritet që ai të bisedojë me drejtuesit e bashkisë, që më pas të marrë një vendim. Me trajnerin në dyshim, gjërat vështirësohen, pasi largimet mund të vazhdojnë. Por kjo nuk shqetëson askënd, pasi Sopoti në fazën e dytë do të ketë në përbërje vetëm lojtarë të rinj, të cilët vështirë se mund ta mbajnë në kategorinë e parë. Arsyeja kryesore e zhytjes së ekipit në këtë krizë është financiare.

Te Sopoti po financon vetëm pushteti lokal, që nuk mund t’i përballojë të gjitha shpenzimet. Lojtarët nuk janë paguar rregullisht dhe kjo ka ndikuar në rezultate, për më tepër që në fund të fazës së parë ata e braktisën ekipin. Tashmë te Sopoti ka shumë boshllëqe dhe duket se ai do të shfaqet një ekip i arnuar gjatë fazës së dytë. Porta është më problematike, pas largimit të titullarit Klodian Micja dhe Çelës. Duke parë problemet që ka ky ekip, vështirë të mendohet një ndreqje e situatës, pasi faza e dytë është vetëm pak ditë larg.

 

Marre nga Gazeta Shqip

Vendose ne Facebook